නිදුක් බලන කට්ටිය

2011/08/26

සච්චක දමනය


මං අද කියන්නේ පහුගිය ලිපි වලින් කිව්වාට වඩා ටිකක් විතර වෙනස් කතාවක්. ඒ කියන්නේ මේක අපේ ගෞතම බුදු හාමුදුරුවන්ගේ කාලෙ සිද්ධ වුනා යැයි කියන කතාවක්.

මේක තමයි ඔය චුල්ල සච්චක සූත්‍රයේ නිධාන කතාව. ඔන්න අපේ බුදු හාමුදුරුවෝ වැඩ හිටියලු විශාලා මහනුවර මහ කැලේ තිබුණු කූටාගාර ශලාවේ. ඒ නුවර සච්චක කියලා නිගන්ඨයෙක් හිටියලු.

මේ සච්චක බොහොම උගත් බුද්ධිමත් කෙනෙක්. වාද කිරීමට විශාල හැකියාවක් මේ සච්චකට තිබුණ හින්දා බොහෝ දෙනා මෙයාට බොහොම ගෞරව කළා. සච්චකත් ඉතිං තමන් ගැන ටිකක් ඕනවට වඩා ආඩම්බරයකින් හිටියේ. මාත් එක්ක වාද කරලා කාටවත් දිනන්න බෑ, නිකංම ඔවුන් ලැජ්ජාවට පත්වෙනවා කියලා තමයි සච්චක හිතාගෙන හිටියේ.
ඔන්න දවසක් සච්චකට හමු වුණා අස්සජි හාමුදුරුවන්ව. හාමුදුරුවොත් එක්ක කතාවට වැටුණු සච්චක අහනවලු, අස්සජි හාමුදුරුවනේ, ඔය බුදු හාමුදුරුවෝ මොන වගේ අනුශාසනාවකින්ද එතුමා ගේ ශිෂ්‍යයින් හික්මවන්නේ? කියලා.
එතකොට අස්සජි හාමුදුරුවෝ කියනවා, “රූප, වේදනා, සංඥා, සංඛාර, විඤ්ඤාණ කියන මේ හැම ධර්මයක්ම අනිත්‍ය බවත්, ආත්ම නොවන බවත් දුක බවත් උන්වහන්සේගේ ශිෂ්‍යයින්ට අනුශාසනා කරනවා” කියලා. මේක අහලා සච්චක කියනවා, හොඳයි මං එන්නං බුදු හාමුදුරුවොත් එක්ක මේ ගැන තර්ක කරලා එතුමාව පරද්දන්න කියලා.

ඔන්න ඉතිං සච්චක යනවා බුදු හාමුදුරුවො මුණ ගැහිලා මේ ගැන වාද කරන්න. එයා එතෙන්ට යනකොට වේදේහ රටේ ලිච්ඡවී ලත් ඇවිල්ලා ඉන්නවා බුදු හාමුදුරුවෝ බැහැ දකින්න. දැං සච්චක හිතුවා මෙයාලටත් පෙන්නන්න ඕන මගේ වාද කිරීමේ දක්ෂතාවය කියලා. එයාලටත් ආරාධනා කළා වාදය බලන්න.

සච්චක බුදු හාමුදුරුවන්ගෙන් අහනවා, බුදු හාමුදුරුවනේ මට ප්‍රශ්ණ කීපයක් තියෙනවා ඔබ තුමාගෙන් අහන්න, ඒකට අවසරද කියලා. බුදු හාමුදුරුවො කිව්වා අහන්න කියලා. සච්චක කියනවා මං ඒ ප්‍රශ්ණය උපමාවකින් අහන්නම් කියලා. මෙන්න මේ අදහසයි දෙබසේ තිබුණේ.
සච්චක:
පොළොවේ වැඩෙන ධාන්‍ය වර්ග, ගස් වැල් ආදිය පැළවී, උස් මහත් වී ඵල දරන්නේ පොළොව මුල් කොට ගෙන මෙන් ශරීර ශක්තියෙන් කෙරෙන කර්මාන්ත කය ආත්ම කොට ගෙන නේද? රූප, වේදනා, සංඥා, සංඛාර, විඤ්ඤාණ ආත්ම කොට ගෙන පිං හෝ පවු රැස් කරනවා නේද? 
බුදු හාමුදුරුවෝ :
සච්චක කියන්නේ රූප, වේදනා, සංඥා, සංඛාර, විඤ්ඤාණ ඔබ, ඔබේ ආත්මය යැයි කියලාද?
සච්චක:
මං විතරක් නෙවෙයි මේ හැමෝම එහෙම කියනවා.
බුදු හාමුදුරුවෝ :
අනික් අයව ගාවන්න ඕනි නෑ, සච්චක ගේ අදහස කියන්නකෝ.
සච්චක:
ඔවු. මං කියන්නේ රූප, වේදනා, සංඥා, සංඛාර, විඤ්ඤාණ මගේ ආත්මය, මම යැයි කියලා
බුදු හාමුදුරුවෝ :
ඔටුණු පළන් රජ කෙනෙකුට තමාගේ රටේ මරන්ට ඕන කෙනෙකු මරන්ටත්, ධනය රාජසන්තක කළ යුත්තෙකුගේ ධනය රාජසන්තක කරන්නටත්, රටින් නෙරපිය යුත්තෙකු රටින් නෙරපන්නටත් බලය තියෙනවාද?
සච්චක:
ඔවු පුළුවං. ඔටුණු පැළැන්දේ නැති වුණත් මහ පිරිසක් ඉන්න ලිච්ඡවීන්ටත් මල්ල රජවරුන්ටත් ඒ බලය තියෙනවා.
බුදු හාමුදුරුවෝ :
එතකොට මගේ ආත්මයැයි කියපු රූපය ඔබට ඕනි ඕනි විදිහට වෙනස් කරන්න බලය තියෙනවාද? (දැං නං ප්ලාස්ටික් සැත්කම් වලිං පුළුවං. ඒත් ඒ ස්වභාවික රූපය නෙවෙයි නොවැ. ඒකත් තාවකාලිකයි නොවැ..)
සච්චක :
(කට උත්තර නැතිව බලා හිඳී…)
බුදු හාමුදුරුවෝ :
(පෙර ප්‍රශ්ණයම නැවත ඇසු සේක.)
සච්චක :
බැහැ, බුදු හාමුදුරුවනේ. මට රූපය ගැන එහෙම බලයක් නෑ.
බුදු හාමුදුරුවෝ :
එතකොට වේදනා, සංඥා, සංඛාර, විඤ්ඤාණ කියන ධර්මත් එහෙම තමන්ට ඕනි ඕනි විදිහට වෙනස් කරන්න ඔබට බලයක් තියෙනවාද?
සච්චක :
බැහැ, බුදු හාමුදුරුවනේ. මට එහෙම බලයක් නෑ.
බුදු හාමුදුරුවෝ :
ඔබ මුලින් කිව්ව තර්කයත් දැන් කියන දේත් හරිම පරස්පරයි. මොකද හිතන්නේ…
රූපය අනිත්‍යයයි නේද?
සච්චක :
එහෙමයි.
බුදු හාමුදුරුවෝ :
මොනවා හරි අනිත්‍ය නම් ඒක දුකයි ද, සැපයි ද?
සච්චක :
ඒක දුකක් නේ බුදු හාමුදුරුවනේ…
බුදු හාමුදුරුවෝ :
යමක් අනිත්‍ය නම්, වෙනස් වෙන සුළු නම් , මෙය මාගේය, මම වෙමි හෝ මගේ ආත්මය යැයි හිතන්නට පුළුවන්ද?
සච්චක :
බැහැ. බුදු හාමුදුරුවනේ..
බුදු හාමුදුරුවෝ :
අරටුවෙන් යම් ප්‍රයෝජනයක් ගන්න අරටුවක් හොයාගෙන කැලේට යන මිනිසෙකු, හොඳ විශාල කෙහෙල් ගහක් දැකලා මුලින්ම කපා ගන්නවා. ඊට පස්සේ අරටුව හොයන්න පතුර බැගින් ගලවනවා…. අරටුවක් හමු වෙයිද? 
සච්චකත් ඒ වගේ කිසිම හරයක් නැති දෙයක් හරයක් ඇතැයි හිතාගෙන වාදයට එළඹුනත් අවසන ඔබේ අදහසේ හරසුන් බව නිසාත් තර්ක කරන්නට දෙයක් නැති නිසාත් පැරදුණා නේද?
සච්චක :
බුදු හාමුදුරුවනේ, ඔබ වහන්සේගේ ගෝලයන් ඔබ වහන්සේගේ අනුශාසනා පිළි අරං සැකයක් නැති විශාරදයින් බවට පත්වෙනවාද?
බුදු හාමුදුරුවෝ :
මගේ ශ්‍රාවකයින් අතීත, අනාගත, වර්තමාන කාලයන්හී රූපයන් මගේ නෙවෙයි, මම නෙවෙයි, මගේ ආත්මය නෙවෙයි කියලා යහපත් නුවණින් දන්නවා. ඒ වගේම වේදනා, සංඥා, සංඛාර, විඤ්ඤාණ යන ධර්මයන්ද මගේ නෙවෙයි, මම නෙවෙයි, මගේ ආත්මය නෙවෙයි කියලා දන්නවා. ඒ හිංදා ඒ අය සැකයක් නැති විශාරද පිරිසක් තමයි. ඔවුන් මේ විදිහට කෙලෙස් දුරු කරලා, සසර බැඳීම් දුරු කරලා  මහ රහත් ඵලය ලබනවා.

** මෙයින් මහත් ලෙස පැහැදුණු ලිච්ඡවීන් හා සච්චක විසින් පසුදින දානය බුදු රදුන් හා භික්ෂූන් උදෙසා පිළිගන්වනු ලැබුවා.

** මගේ අදහස **
ආත්ම යන වචනය බුදු දහමේ යොදාගෙන ඇත්තේ අප භාවිත කරන ආත්ම යන වචනයට වඩා වෙනස් අරුතකින්යැයි මට හැඟේ. ස්ථීර ව පවතී වැනි තේරුමක් මෙහි ඇතැයි මම සිතමි.
රූප, වේදනා, සංඥා, සංඛාර, විඤ්ඤාණ යන සියළු ධර්මතා නිරන්තරයෙන් වෙනස් වන හෙයින් අස්ථිර වේ. මේ මොහොතේ චතුර යැයි හඳුන්වන කෙනා තවත් මොහොතකින් සිටින චතුරට වඩා වෙනස්ය. 
මදක් සිතන්න මම මොහොතින් මොහොත වෙනස් වෙනවා නම් මම කියා කෙනෙක් නැති බව තේරුම් ගත හැකිය. අනාත්ම යන්නෙන් අදහස් කෙරෙනුයේ අස්ථීර බවයි. අනිත්‍ය යන්නෙන් ඇතිවන හා නැතිවන බවත්, දුක්ඛ යන්නෙන් දුකත් කියැවෙන බව පහසුවෙන් තේරුම් ගත හැකි වුවත් ආත්ම යන්න භවය යන අර්ථයෙන් භාවිතා කරන අප වැනි අයට මෙහි යෙදෙන ආත්ම යන වචනයේ අර්ථය වටහා ගැනීම මඳක් අපහසුය. යම් කෙනෙකුට මෙය වඩාත් පැහැදිලි කළ හැකි නම් බෙහෙවින් ස්තුතිවන්ත වෙමි. 
මෙහි ඇති කතාව සරල බසින් ලියූවේ තේරුම් ගැනීමේ පහසුව සඳහා බැවු සලකන්න.


14 comments:

  1. මිතුර,
    ඉතාම වටිනවා. මම බොහෝ සතුටු වුනා.
    ඔබ අහලා තියනවද, ජෝර්ජ් බර්නාඩ් ෂෝ කියලා තියනවා " එකම ගඟ දෙපාරක් දකින්න බැහැ කියලා. එතකොට බුදුන් වහන්සේ කියලා තියනවා, එකම ගඟ දෙපාරක් දකින්න එකම මිනෙහෙක් කොයින්ද කියලා" බලන්න එකම දේ වුවත් මේ දෙකේ තියන පරතරය. අපි මේ වගේ විශාල ධර්මයක් ලඟ තියාගෙන වල් වැදිලා. නමුත් ඔබ වැනි තරුණයෝ මෙහෙම ලියන එක හරිම වටිනවා. නැවත ලියන්න, මේ වගේ ලස්සන දෙයක්. ජය!!!

    ReplyDelete
  2. මම කියාවත් කෙනෙක් නැත්නම් අනිත් දේවල් ගැන කුමණ කතාද නේද?
    බොහෝ අයට තේරුම් ගත නොහැක්කෙත් මේකනේ..මෙවැනි ලිපි ලියන්නට හැකියාවක් ඇත්තෙත් පිං කල ඇත්තන්ට පමන‍යි යනු මගේ හැගීමයි. ඒ මන්ද කියන්වනම් මේ ලිපිය බලන මොහොතට හෝ අපේ සිතුවිලි වෙනස් වෙනවා. පහන් හැගීමක් සිතට එනවා. දිගටම ලියන්න චතුර.

    ReplyDelete
  3. @වෙද ගෙදර මහ වෙදනා
    බොහොම ස්තුතියි අදහසට. ඇත්තෙන්ම මං ජෝර්ජ් බර්නාඩ් ෂෝ ගේ කතා වලට හරි කැමතියි. ඒත් ඔය කියමන නම් අහලා නෑ. ඒක මේ අදහසට කොයි තරම් ලඟ ද?

    අපි ඇත්ත තේරුම් ගත්තා වුණත්, වැඩ කරගෙන යද්දී ඒ බව අමතක කරලා නොවැ වැඩ කරන්නේ...

    (තරුණයා කියලා කිව්වට විශේෂ ස්තුතිය..)

    ReplyDelete
  4. සෑහෙන්න වැදගත් ලිපියක් සරල බසින් ලියලා .......
    තාමත් ලෝකෙ සච්චකලා ඉන්නවා ....

    ReplyDelete
  5. @Gimhani
    අපි කවුරුත් පිං, පවු අඩු වැඩි වශයෙන් කරලා තියෙනවා. මේ හැම දේම විචල්‍යයන්. යහපත් ජීවන රටා, යහපත් සිතුවිලි, යහපත් පුරුදු මේ විචල්‍ය වූ ජීවිතයේ සැනසීම නම් ඉම වෙත අපව ලං කරනවා. මාත් මේ දහමේ විවර නොවූ තැන් හොයන කෙනෙක්. මං උත්සාහ කරන්නේ ඒ ගමනට තවත් අය එකතු කර ගන්නටයි.
    අදහස් එක් කිරීමෙන් මාව දිරිමත් කිරීම ගැන බොහොම ස්තුතියි. මාසෙකට එක ලිපියක්වත් ලියන්න තමයි හිතාගෙන ඉන්නේ...

    ReplyDelete
  6. //යහපත් ජීවන රටා, යහපත් සිතුවිලි, යහපත් පුරුදු මේ විචල්‍ය වූ ජීවිතයේ සැනසීම නම් ඉම වෙත අපව ලං කරනවා.//


    ඔබ ඉහත කී කරුනු වලින් මිදුන අය වෙන්නැති මෙලොවදීම ලෝ දිය හැලියේ ඉන්නවා වගේ දැවෙමින් ඉන්නේ. අනේ මොන තරම් සිතට අපහසුවක් ඇත්ද?? මේව තමා කල කර්ම . සැනසීමක් නෑනෙ සිතට.
    සරලයි , අර්ථය ගැඹුරුයි...

    ReplyDelete
    Replies
    1. ඔවු.. අපි කවුරුත් විඳවනවා.. පවු කම් වැඩි ඈයො වැඩියෙන් විඳවනවා වෙන්න පුළුවන්...කර්මය කියන විෂයය හැදෑරීම තුළින් මේ දේවල් ගැන වැඩි මනත් අවබෝධයක් ලබා ගන්න පුළුවන්..

      Delete
  7. සරලව ලියල තියෙනව..මේව පින් සිද්ද වෙන වැඩ..බුදු සරණයි..සහෝ..

    ReplyDelete
  8. ඔබතුමාගේ අදහස හොඳයි. අනිත්‍ය අනාත්ම අතර සම්බන්ධයක් ඇති බව හිතන්න පුළුවං. හැකි නම් නාගාර්ජුන හාමුදුරුවන්ගේ මාධ්‍යමිකවාදය කියවා බලන්න.(කොමෙන්ටුව පලකිරීම අවශ්‍ය නැත)

    ReplyDelete
    Replies
    1. බොහොම ස්තුතියි ඉඟියට.. මං කියවා බලන්න උත්සාහ කරන්නම්..

      Delete
  9. සච්චක පුවත් සබැදුම...

    සච්චක දෙවරක්ම බුදු රදුන් සමග වාද කිරීමට ගොස් පැරදුනේය. නමුත් ඔහු බෞද්ධයකු නොවුනේය. බුදුන් ප්‍රමුඛ මහා සoඝයාට දන් පිළිගැන්වූවද, ඔහු දිගටම නිඝන්ඨ ආචාර්‍යය වරෙයෙක් ලෙස කටයුතු කලේය. නමුදු බුදු රදුන් සමග සමීප සම්බන්ධය දිගටම පවත්වා ගත්තේය.

    වෙනත් ආගමක ආචාර්‍යය වරයෙකු සමග බුදු රදුන් පැවති මෙම සමීප මිත්‍රත්වය ගැන භික්ෂූ සoඝයා සාකච්ඡා කළහ. මේ පිළිබදව කටින් කට පැතිර ගොස් බුදු රදුන්ටද දැනගන්නට ලැබිණි. මෙය ඇසූ බුදු රදුන් මෙසේ වදාළ සේක.

    'ඇවැත්නි, බුදුවරු ඒ වෙලාවට ම ලැබෙන ප්‍රථිඵලය ගැනම පමණක් නො බලති. කෙනෙකුට අනාගතයේ හෝ යහපතක් වන්නේ නම් එය ද අවධානයට යොමුකොට ගෙන බුදුවරු ක්‍රියා කෙරති. ඇවැත්නි, මහණෙනි, ඒ අනුව මම අද සච්චක පඩිවරයා වෙනුවෙන් කාලය ගත කළේ ඔහුට අනාගතයේ විදුවන යහපත පිළිබදව සලකා ගෙනය. මේ සච්චක අනාගතයේදී ලක්දිව උපත ලබා ''කාලබුද්ධරක්ඛිත'' නමින් මහ තෙරනමක්ව එසේම මහා පඩිවරයෙක් ව, මහ රහත් බවට පත්ව ලක් දිව බුදු සසුනට අපරමිත සේවයක් කරන්නකු බව මගේ දිවනුවණට දැනුනේ ය. ඔහුට ඒ සිදුවන යහපතට මග සලසනු පිණිස සච්චක කෙලින්ම බෞද්ධයකු නො වුවද ඔහු සමග සම්බන්ධතා පවත්වමි'

    මහා සච්චක සුත්‍ර අටුවාවෙහි, පසු කාලීන කථාව දක්වා ඇත.....

    ** මගේ අදහස **

    මෙයට වසර දෙදහස් පන්සිය ගණනකට පෙරත් අප බුදු රදුන් මේ ලක්දිව බුදු සසුනේ චිරස්ථිතිය වෙනුවෙන් තම වටිනා කාළය වැය කළ සේක. බෞද්ධයින් ලෙස අප බුදු සසුන වෙනුවෙන ගහ මරා ගැනීමට වඩා ප්‍රයෝජනවත් යමක් කළයුතු නොවේද?

    පසු කාලීන කථාව.....

    දුටුගැමුණු රජුගේ සහෝදර 'සද්ධාතිස්ස' රජු ලක්දිව පාලනය කරණ කාලයේ, රජුගේ අමාත්‍යය මණ්ඩලයේ ඇමති වරයෙකුගේ බිසවට 'කාල' නම් පුත් කුමරෙක් උපන්නා. (දීප්තිමත් කලු ශරීරයක් සහිත වු හෙයින් හෙතෙම එම නම ලද්දේය ) ඉගනීමට උපන් හපනෙකු වූ කාල පෙර පින් හේතුකොට ගෙන උපතේ සිට පිනට දහමට ඉතා කැමති විය. කුඩා කාලයෙදීම මහා විහාරික භික්ෂූන් වහන්සේලා වෙතින් පැවිද්ද ලද්දේය.

    භාෂා ශාස්ත්‍රය සහ ත්‍රිපිටක ධර්මය මහා විහාරයෙන් මනා ලෙස හදාරා, උසස් අධ්‍යාපනය පිණිස රුහුණට ගොස් තිස්සමහාරාමයේ වෙසෙමින් සිතුල්පවුව වෙහෙරෙහි මගඵල ලාභී මහ තෙරවරුන්ද ඇසුරු කරමින් බුදු දහම පිළිබද හසල බුද්ධියක්, දැනුමක් ලබා ගත්තේය. ත්‍රිපිටක ධර්මයේ කොතනකින් වුවද ප්‍රශ්නයක් නැගූවද ඒවාට පිළිතුරු දීමට සමත් විය.

    පැවිද්දෙන් පසු 'බුද්ධරක්ඛිත' යන නාමය ලැබූවද පාට නිසා 'කාල' යන නාමය ගිලිහී නොගොස් 'කාලබුද්ධරක්ඛිත' තෙරණුවෝ යැයි ප්‍රසිද්ධියට පත් වූහ. උන් වහන්සේ චතුර දේශකයෙක් වූහ. ගැඹුරු දහම් පැහැදිලිව දේශනා කිරීමේ පුදුමාකාර හපනෙක් වූහ. එසේම සිල්වත් ගුණවත් කමින් පිරිපුන් සිපේශල ශික්ෂාකාමී යතිවරයාණාන් කෙනෙක් වූහ. රටවාසී ගිහි පැවිදි කාගේත් සිත් සතන් දිනාගත් උන් වහන්සේ දහස් ගණන් බාල තරුණ භික්ෂූන් වහන්සේලාගේ ආචාර්‍යය වරයෙක්ද වූහ.

    Modern Patriot

    ReplyDelete
    Replies
    1. බොහොම ස්තුතියි මේ කරුණු වලට මිත්‍රයා.. කාල බුද්ධ රක්ඛිත හිමියන් ගැන මං අහලා තියෙනවා.. තර්ක කිරීමේ හැකියාව සාංසාරිකව ගෙනාපු එකක් බව පැහැදිලියි මෙතැනදී..

      Delete
    2. ආත්මයි කියන්නේ තමන්ගේ වසඟයේ පවත්වන්න පුළුවන් කියන එක,
      ඒ කියන්නේ මගේ යැයි සලකන ඇස මෙසේ වේවා මෙසේ නොවේවා කියල වෙනස් කරන්න පුළුවන් යැයි හැඟීම.
      ඒ වගේම මෙයින් අදහස් වෙනවා සදාකාලිකව පවතින ස්ථීර වූ පුද්ගලයෙක් ඉන්නවා කියලා.
      කියවන්න බ්‍රහ්මජාල සූත්‍රය,
      දීඝ නිකාය1.

      Delete

ඔබේ අදහස බොහො වටී මට